Il-politika tal-kompetizzjoni tikkonsisti fl-applikazzjoni ta' regoli li jiżguraw li n-negozji u l-kumpaniji jikkompetu b'mod ġust ma' xulxin. Din tħeġġeġ l-intrapriża u l-effiċjenza, toħloq għażla usa' għall-konsumaturi u tgħin tnaqqas il-prezzijiet u ttejjeb il-kwalità.
Prezzijiet irħas għal kulħadd: L-iktar mod faċli kif jinkiseb sehem għoli fis-suq hu li jiġi offrut prezz aħjar. F'suq kompetittiv, il-prezzijiet jinżlu. Dan mhux biss hu tajjeb għall-konsumaturi - meta iktar nies jistgħu jixtru prodotti, dan jinkuraġġixxi lin-negozju jipproduċu u l-ekonomija tikber b'mod ġenerali.
Kwalità aħjar: Il-kompetizzjoni tinkuraġġixxi wkoll lin-negozji jtejbu l-kwalità tal-prodotti u s-servizzi li jbiegħu biex jattiraw iktar konsumaturi u jwessgħu is-sehem tas-suq tagħhom. Il-kwalità tfisser: prodotti li jservu iktar jew jaħdmu aħjar; appoġġ ta' wara l-bejgħ jew tekniku aħjar; servizz iktar amikevoli u aħjar.
Aktar għażla: F'suq kompetittiv, in-negozji jippruvaw jagħmlu l-prodotti tagħhom differenti mill-bqija. Dan jirriżulta f'għażla akbar biex il-konsumaturi jkunu jistgħu jagħżlu l-prodott li joffri bilanċ tajjeb bejn il-prezz u l-kwalità għalihom.
Innovazzjoni: Biex titwassal din l-għażla, u jsiru prodotti aħjar, in-negozji jeħtieġu jkunu innovattivi - fil-kunċett u d-disinn tal-prodott tagħhom, fit-tekniki tal-produzzjoni, fis-servizzi, eċċ.
Kompetituri aħjar fis-swieq globali: Il-kompetizzjoni fi ħdan l-UE tgħin lill-kumpaniji Ewropej isiru iktar b'saħħithom barra l-UE wkoll - u kapaċi jibqgħu sodi quddiem il-kompetituri globali.
Ara l-filmat biex tara kif taħdem fil-prattika |
Ara hawn kif il-politika tal-kompetizzjoni jista' jkollha effett pożittiv f'ħajtek |
|
|---|---|---|
|
Tista' tniżżel dan il-filmat mill-websajt awdjoviżwali tal-Kummissjoni Ewropea. |
Tista' tniżżel dan il-filmat mill-websajt awdjoviżwali tal-Kummissjoni Ewropea. |
U x'inhu r-rwol tiegħek f'dan kollu?
Int għandek rwol ewlieni biex iżżomm in-negozji kompetittivi. L-għażla tiegħek ta' liema prodott tixtri tiddetermina d-direzzjoni li tieħu dik il-kumpanija.
U billi tibqa' informat u tirrapporta lill-kumpaniji li taħseb li mhumiex qed jaġixxu b'mod ġust u kompetittiv, tkun qed tiżgura li n-negozji jibqgħu jipprovdu iktar għażla, kwalità, innovazzjoni u prezzijiet iktar baxxi.